ანალიტიკოსი გია აბაშიძე მედიაში გავრცელებულ ინფორმაციას ეხმიანება, რომლის მიხედვითაც, აშშ-ს სახელმწიფო დეპარტამენტის სპიკერს, მეთიუ მილერს საქართველოს მიმართ გაკეთებული განცხადებების გამო მწვავედ აკრიტიკებენ.
როგორც ანალიტიკოსი წერს, აშშ-ის სახელმწიფო დეპარტამენტს მართებულად აკრიტიკებენ ამერიკის გადასახადის გადამხდელები საქართველოს შიდა საქმეებში ჩარევის გამო.
„აშშ-ის სახელმწიფო დეპარტამენტს მართებულად აკრიტიკებენ ამერიკის გადასახადის გადამხდელები საქართველოს შიდა საქმეებში ჩარევის გამო – თვალთმაქცობა ადვილად შესამჩნევია, უწინარესად, იმ ხალხისთვის, რომელთა ისტებლიშმენტიდანაც ვისმენთ “დარიგებას”.
არცთუ ისე დიდი ხნის წინ, აწ უკვე ყოფილ კონგრესმენს ადამ კინზინგერს სასტიკად უპირისპირდებოდა მისი ოლქის ელექტორატი ილინოისიდან – შტატის საქმეებს მიხედე და შენი განსახილველი არაა საქართველოს საარჩევნო სისტემა! იყო ამგვარი მწვავე განცხადებებიც სოცქსელში.
იმის გარდა, რომ აშშ-ის ხელისუფლებას ამერიკის განვითარების ხარჯზე უკრაინის დახმარებაზე აკრიტიკებენ ამერიკელები, ამას ემატება ცეცხლმოკიდებული ახლო აღმოსავლეთის გამო აღშფოთება, ახლა უკვე საქართველოს გამოც მართებულად შეწუხდნენ აშშ-ის მოქალაქეები.
5 ნოემბრის საპრეზიდენტო არჩევნები კი არაა შორს.“-წერს გია აბაშიძე სოციალურ ქსელში.
