მარნეული-ბოლნისის დამაკავშირებელ საავტომობილო გზაზე მომხდარ ავტოსაგზაო შემთხვევასთან დაკავშირებით, რომლის შედეგად ქვეითად მოსიარულე ორი მოზარდი დაიღუპა, შინაგან საქმეთა სამინისტრო განცხადებას ავრცელებს.
განცხადების თანახმად, სამართალდამცველებმა ავტოსაგზაო შემთხვევაში მონაწილე მძღოლი დააკავეს.
„შინაგან საქმეთა სამინისტროს საპატრულო პოლიციის დეპარტამენტის ქვემო ქართლის მთავარი სამმართველოს თანამშრომლებმა, ცხელ კვალზე ჩატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, მარნეული-ბოლნისის დამაკავშირებელ საავტომობილო გზაზე მომხდარ ავტოსაგზაო შემთხვევაში მონაწილე მძღოლი 2003 წელს დაბადებული თ.ჩ. დააკავეს.
გამოძიებით დადგინდა, რომ აღნიშნული პირი, საავტომობილო გზაზე, თავისი მართვის ქვეშ მყოფი ავტომობილით ოთხ მგზავრთან ერთად გადაადგილდებოდა, რა დროსაც მოხდა ავტოსაგზაო შემთხვევა, რომლის შედეგად, ქვეითად მოძრავი ორი მოზარდი, აქედან ერთ-ერთი ადგილზე, ხოლო მეორე სამედიცინო დაწესებულებაში გარდაიცვალა.
გამოძიება სისხლის სამართლის კოდექსის 276-ე მუხლით მიმდინარეობს“, – აცხადებენ სამინისტროში.
მარნეული-ბოლნისის გზაზე, სოფელ ნახიდურთან, ავტოსაგზაო შემთხვევის შედეგად ორი მოზარდი დაიღუპა.
