იერუსალიმში, ბენიამინ ნეთანიაჰუს სახლის წინ გამართულ საპროტესტო აქციაზე ხუთი დემონსტრანტი დააკავეს. ინფორმაციას ადგილობრივი მედია ავრცელებს.
ბენიამინ ნეთანიაჰუს სახლის წინ აქცია მძევლების გათავისუფლების მოთხოვნით გაიმართა. დემონსტრაციაში 20-მდე ადამიანი იღებდა მონაწილეობას. აქციის მონაწილეები ნეთანიაჰუს სახლთან სკანდირებდნენ, რომ ღაზაში „ჰამასის“ მიერ მძევლად აყვანილი ადამიანები იტანჯებიან.
როგორც ადგილობრივი მედია წერს, დაახლოებით 20 წუთის შემდეგ აქციის მონაწილეები დაიშალნენ, რა დროსაც ისინი პოლიციამ გააჩერა და ახლომდებარე პოლიციის განყოფილებაში დაკითხვაზე გადაიყვანა. პოლიცია აცხადებს, რომ ისინი ხმაურის გამო დააკავეს.
