USAID-მა დიდი ხანია გადაუხვია თავის თავდაპირველ მისიას, რომელიც საზღვარგარეთ ამერიკული ინტერესების პასუხისმგებლიანად წინ წაწევას ითვალისწინებდა, – ნათქვამია აშშ-ის სახელმწიფო დეპარტამენტის განცხადებაში.
„ახლა სრულიად ნათელია, რომ USAID-ის დაფინანსების მნიშვნელოვანი ნაწილი არ შეესაბამება შეერთებული შტატების ძირითად ეროვნულ ინტერესებს. ამ ვითარების გასაანალიზებლად და სააგენტოს საქმიანობაზე უკეთესი კონტროლის დასამყარებლად, პრეზიდენტმა დონალდ ტრამპმა სახელმწიფო მდივანი, მარკო რუბიო USAID-ის ადმინისტრატორის მოვალეობის შემსრულებლის პოზიციაზე დანიშნა“, – ნათქვამია განცხადებაში.
სახელმწიფო დეპარტამენტში აღნიშნეს, რომ მარკო რუბიომ ასევე აცნობა კონგრესს, რომ მიმდინარეობს USAID-ის საგარეო დახმარების საქმიანობის შემოწმება პოტენციური რეორგანიზაციის მიზნით.
„ჩვენ ვაფასებთ USAID-ის საქმიანობას, რათა დავრწმუნდეთ, რომ ის სრულად შეესაბამება America First დღის წესრიგს და სახელმწიფო დეპარტამენტის პოლიტიკას. ჩვენ გავაგრძელებთ ამერიკელი ხალხის ინტერესების დაცვას და უზრუნველვყოფთ, რომ მათი გადასახადებიდან გაღებული სახსრები მიზნობრივად იხარჯებოდეს“, – აღნიშნულია განცხადებაში.
