სუროგაციის მეთოდის გამოყენება მხოლოდ საქართველოს მოქალაქეებისთვის უნდა იყოს დაშვებული, – ამის შესახებ საქართველოს პრემიერ-მინისტრმა, ირაკლი ღარიბაშვილმა მთავრობის სხდომის დაწყებამდე განაცხადა.
პრემიერმა დაასახელა ქვეყნები, სადაც სუროგაცია საერთოდ აკრძალულია. მისივე თქმით, შეიმუშავეს კანონი, რომლითაც სუროგაციით უცხოელები ვერ ისარგებლებენ. აღნიშნულის შესახებ კანონპროექტი კი უკვე პარლამენტშია გადაგზავნილი.
„ძალიან ბევრი რეკლამა ვრცელდება ამასთან დაკავშირებით და ჩვენს მოქალაქეებს, ქალბატონებს სთავაზობენ ე.წ. სარფიან ბიზნესს. შემდეგ არავინ იცის, აქ დაბადებული ბავშვი ვის გაჰყავს, რომელ წყვილს. არსებობს ინფორმაციები, შესაძლოა ერთნაირსქესიან წყვილებს გაჰყავთ აქ დაბადებული ბავშვები და შესაძლოა, უამრავი პრობლემა იყოს. სხვა სირთულეებსაც გადააწყდა ჩვენი უწყება, ჯანდაცვის სამინისტრო. ამდენად, ამას სჭირდება რეგულირება.
შესაბამისი კანონპროექტი პარლამენტში გაიგზავნა და იმედი მაქვს, ამ ინიციატივას პარლამენტი მხარს დაუჭერს. აუცილებელია ეს დარეგულირდეს, დაშვებული იქნება მხოლოდ ჩვენი მოქალაქეებისთვის. ვიცი, ბევრია მსურველი, ვისაც შვილი არ უჩნდება, ამიტომ სუროგაციის მეთოდს მიმართავენ. რა თქმა უნდა, მათთვის ეს უნდა იყოს დაშვებული“, – განაცხადა ღარიბაშვილმა.
