ევროკავშირი შეიმუშავებს მტკიცე გარანტიებს იმის უზრუნველსაყოფად, რომ მომავალმა წევრმა ქვეყნებმა გაწევრიანების შემდეგ უარი არ თქვან გატარებულ რეფორმებზე ან არ გამოიყენონ ვეტოს უფლება ბლოკის მუშაობის დასაბლოკად, – განაცხადა გაფართოების საკითხებში ევროკომისარმა, მარტა კოსმა.
„თუ ახალი წევრი ქვეყანა წესებს დაიცავს, არაფერი მოხდება. თუ ისინი წესებს არ დაიცავენ, დამცავი მექანიზმები მკაცრად ამოქმედდება და სწორედ ასეთ სისტემას ვაშენებთ ჩვენ“, – განუცხადა კოსმა გამოცემა POLITICO-ს.
მისი თქმით, ევროკომისიას უკვე „აქვს გარკვეული იდეები“ სისტემის გაძლიერების თაობაზე, რაც მოიცავს დამცავ გარანტიებსა და გარდამავალ პერიოდებს გარკვეული წევრობის უფლებების სრულად მინიჭებამდე.
ევროკავშირის აღმასრულებელი შტო კონსულტაციებს მართავს წევრ ქვეყნებთან, რომლებიც შიშობენ, რომ მომავალმა გაფართოებამ შესაძლოა გაართულოს გადაწყვეტილების მიღების პროცესი ან მისცეს მთავრობებს რეფორმების უკუქცევის შესაძლებლობა ბლოკში გაწევრიანების შემდეგ.
ევროკავშირის წევრი ქვეყნები, მათ შორის საფრანგეთი, გერმანია და ნიდერლანდები, ამტკიცებენ, რომ ნებისმიერ გაფართოებას თან უნდა ახლდეს იმის გარანტიები, რომ რეფორმები მდგრადი იქნება და ახალი წევრები არ დაარღვევენ ბლოკში არსებულ ძალთა ბალანსს.
„რასაც ახლა ვხედავ – და ეს ცვლილება ბოლო კვირებში შეიმჩნევა – არის ის, რომ ჩვენი წევრი ქვეყნების სულ უფრო მეტი ლიდერი ერთვება პროცესში და მოაქვს იდეები“, – დასძინა კოსმა. „იმედი მაქვს, მალე უფრო მეტის თქმა შეგვეძლება, თუმცა მთავარი იდეა იმაში მდგომარეობს, რომ ზოგიერთი წევრი ქვეყნის წარსული გამოცდილებიდან გამომდინარე, პრობლემები შეგვექმნა იმის გამო, რომ წესებს აღარ იცავდნენ“.
