ეუთოს საპარლამენტო ასამბლეის პრეზიდენტმა პია კაუმამ “ევრონიუსთან” ინტერვიუში საქართველოში 26 ოქტომბერს ჩატარებული საპარლამენტო არჩევნები შეაფასა და აღნიშნა, რომ ის ამომრჩევლებს არჩევანის ფართო საშუალებას აძლევდა და თავისუფალი აგიტაციის პირობებში ჩატარდა.
“საქართველოში გამართულ არჩევნებზე მე [სადამკვირვებლო მისიის] ლიდერი ვიყავი და ვნახე, რომ პარტიებს შორის არსებობდა მაღალი პოლარიზაცია, თუმცა არჩევნები ამომრჩევლებს არჩევანის ფართო საშუალებას აძლევდა და თავისუფალი აგიტაციის პირობებში ჩატარდა”, – აღნიშნა მან.
მისი თქმით, საქართველოს არჩევნებს 42 ქვეყნის 500-ზე მეტი საერთაშორისო დამკვირვებელი აკვირდებოდა, რომლებიც ქართველ ხალხს დაეხმარნენ და მთავრობას საარჩევნო პროცესში არსებულ გარკვეულ ნაკლოვანებებზე მიუთითეს, რომელიც შემდგომში აღმოსაფხვრელია.
“მე უკვე შევთავაზე ახლად არჩეულ საქართველოს ხელისუფლებას შესაძლებლობა კონსტრუქციულად ითანამშრომლოს ეუთოს საპარლამენტო ასამბლეასთან საკანონმდებლო ორგანოში ახალი რეკომენდაციების განხილვის მიზნით, რაც მალე „ოდირის“ დასკვნაშიც იქნება აღნიშნული”, – დასძინა მან.
