შესაძლოა, საზოგადოებას ორგანიზაციების დაფინანსება საერთოდ არ აინტერესებდეს, თუ ამ ორგანიზაციას არ ექნება ამბიცია, ზეგავლენა მოახდინოს პოლიტიკურ გადაწყვეტილებებზე, – ასე უპასუხა პარლამენტის ევროინტეგრაციის კომიტეტის თავმჯდომარემ, მაკა ბოჭორიშვილმა პირველი არხის გადაცემის „გადაწყვეტილება“ წამყვანის შეკითხვას, რაში სჭირდება საზოგადოებას იმის ცოდნა, რისთვის იღებენ დაფინანსებას არასამთავრობო ორგანიზაციები და რაში ხარჯავენ ფულს?
„ჩვენ ახლა ვსაუბრობთ ისეთ ვითარებაზე, როდესაც გაზრდილია სამოქალაქო საზოგადოების, არასამთავრობო ორგანიზაციების როლი და ჩვენც ვხსნით კარს, იმავე ცხრა ნაბიჯის განხილვის პროცესში კარს ვხსნით პარლამენტში და ვპატიჟებთ სამოქალაქო საზოგადოების წარმომადგენლებს, რათა მათი აზრი მოვისმინოთ. რატომ არ უნდა იცოდეს საზოგადოებამ, რა ინტერესები დგას პოზიციების უკან, რომელიც გამოითქმის მაგიდასთან, სადაც პოლიტიკური გადაწყვეტილება უნდა მივიღოთ?“ – განაცხადა ბოჭორიშვილმა.
შეკითხვაზე, რატომ ესწრებიან ამა თუ იმ საკითხის განხილვის პროცესს ის ორგანიზაციები, რომელთა მიმართებაშიც ეჭვი არსებობს, მაკა ბოჭორიშვილმა განაცხადა, რომ, გარკვეულწილად, ეჭვი არსებობს, თუმცა ეჭვი ერთადერთი საფუძველი არ არის და საზოგადოება უფრო მეტად უნდა იყოს ინფორმირებული, რა ორგანიზაციები მონაწილეობენ ჩვენ პოლიტიკურ ცხოვრებაში და რა ინტერესებით.
პარლამენტის ევროინტეგრაციის კომიტეტის თავმჯდომარემ ასევე განაცხადა, რომ კარგია, თუკი საზოგადოებას ეცოდინება, რა ორგანიზაციები რა ინტერესებით მოქმედებენ საქართველოში.
