მერამდენე რეზოლუციაა, რომელიც აბსოლუტურად მოკლებულია ინფორმაციას და შეგრძნებას, თუ რა ხდება საქართველოში, რა მოხდა რეალობაში, რატომ არიან ეს ადამიანები დაპატიმრებული, – განაცხადა საქართველოს იუსტიციის მინისტრმა პაატა სალიამ ევროპარლამენტის რეზოლუციასთან დაკავშირებით. მისი თქმით, ამ რეზოლუციებს საქართველოს მოსახლეობაზე გავლენა არ აქვს.
„როდესაც ევროპარლამენტი დღესაც მიხეილ სააკაშვილის გათავისუფლებას მოგვიწოდებს, ამით ყველაფერი ნათელია. ეს არის კონკრეტულად ერთი პოლიტიკური პარტიის მხარდამჭერი ლობი და წარმომადგენლობა ევროპის პარლამენტში. არანაირი ძალა, არანაირი გავლენა ამას არა აქვს, უპირველესად, ჩვენს მოსახლეობაზე, „ქართული ოცნების“ ამომრჩეველზე. მოქალაქეები ხედავენ, სად არის სიმართლე. ასეთი მაღალი ტრიბუნიდან როდესაც მსგავსი რეზოლუციები მოდის, ეს მათ რეპუტაციას აზიანებს პირველ რიგში“, – აცხადებს სალია.
