გერმანელების მხოლოდ 14%-ს მიაჩნია, რომ ქვეყნის მოქმედი კანცლერი, ფრიდრიხ მერცი, ამ თანამდებობისთვის შესაფერისია. მთავრობის ხელმძღვანელით რესპონდენტთა 78% უკმაყოფილოა, – იუწყება სოციოლოგიური ინსტიტუტ Insa-ს გამოკითხვა, რომელიც Bild-ისთვის ჩატარდა. ერთი კვირის წინანდელ გამოკითხვაში ეს მაჩვენებლები, შესაბამისად, 16%-ს და 77%-ს შეადგენდა.
მერცის პოპულარობა წელზე მეტია, მცირდება. 2025 წლის ივნისში, ახალი მთავრობის მუშაობის დაწყებიდან დაახლოებით ერთ თვეში, კანცლერს გერმანელების 36% უჭერდა მხარს. ახლა რესპონდენტთა 31%-ს მიაჩნია, რომ მმართველი ბლოკიდან (CDU/CSU) მერცზე ეფექტიანი შესაძლოა ბავარიული CSU-ს ლიდერი, მარკუს ზიოდერი ყოფილიყო.
თავად ზიოდერმა საჯაროდ დაუჭირა მხარი მერცს და ხაზგასმით აღნიშნა, რომ CSU „არცერთ შემთხვევაში“ არ წამოაყენებს კანცლერის შეცვლის ინიციატივას. Bild-თან ინტერვიუში ზიოდერმა განაცხადა, რომ საქსონია-ანჰალტში ულტრამემარჯვენე „ალტერნატივა გერმანიისთვის“ (AfD) გამარჯვება გახდა „უკმაყოფილების ყველაზე ხმამაღალი სიგნალი გერმანიის ისტორიაში“ და ეს მოწმობს „არა კოალიციის კრიზისს, არამედ სრულიად გერმანიის კრიზისს“. CSU-ს ლიდერმა აღნიშნა, რომ მერცი საზღვარგარეთიდან მართული აგრესიული კამპანიის სამიზნე გახდა.
„თვითონ შეხედეთ: კვირას პრეზიდენტი დონალდ ტრამპიც და ვლადიმერ პუტინიც აქტიურად უწევდნენ აგიტაციას AfD-ს. მომხდარა ასეთი რამ ბოლო 60 წლის განმავლობაში, რომ მოსკოვი და ვაშინგტონი ასე აქტიურად ჩარეულიყვნენ რეგიონულ არჩევნებში?“ – განაცხადა ზიოდერმა.
