რუსეთი საქართველოსთან აფხაზეთის გავლით სარკინიგზო მიმოსვლის აღდგენის შესაძლებლობას განიხილავს, – განაცხადა რუსეთის ვიცე-პრემიერმა ალექსეი ოვერჩუკმა.
„კავკასიაში ყველა გაუქმებული გზების განბლოკვაზე მუშაობა მიმდინარეობს, მათ შორის განიხილება სარკინიგზო მიმოსვლის აღდგენა რუსეთის ფედერაციასა და საქართველოს შორის აფხაზეთის ტერიტორიის გავლით“, – აღნიშნა ოვერჩუკმა.
რუსეთის ვიცე-პრემიერის განცხადებით, ამ მარშრუტის აღდგენა მნიშვნელოვანია სხვა „დიდი ამოცანის“ გადასაჭრელად, რომელიც კავკასიის სატრანსპორტო-ლოგისტიკური კავშირის გაძლიერებას ეხება და რაც კრიტიკულად მნიშვნელოვანია „აზერბაიჯანის, სომხეთის, საქართველოს, ირანის, თურქეთისა და რუსეთის ხალხების მშვიდობის, სტაბილურობისა და ეკონომიკური განვითარებისთვის“.
„იმედი გვაქვს, რომ რეგიონის ყველა სახელმწიფო აღნიშნული მნიშვნელოვანი ამოცანის გადაჭრის დროს კონსტრუქციულად ითანამშრომლებს“, – დასძინა ოვერჩუკმა.
