პარტია „ხალხის ძალის“ საერთაშორისო ურთიერთობათა მდივანმა ეკა სეფაშვილმა „ქართული ოცნების“ მიერ BBC-ის წინააღმდეგ დაწყებულ დავასთან დაკავშირებით ჟურნალისტებთან საუბარში კომენტარი გააკეთა და განაცხადა, რომ ბრიტანეთის მაუწყებლისთვის, ეს არის ერთგვარი ტესტი, რათა დაამტკიცოს ერთგულება კანონის წინაშე.
„BBC-ს აქვს კარგი შანსი, დაამტკიცოს, რომ იგი ერთგულია თავის რეგულაციებისა და პრინციპების, რომელიც იცავს სიტყვის თავისუფლებას და უზრუნველყოფს მოსახლეობისთვის პირუთვნელი და რეალური ინფორმაციის მიწოდებას.
ეს არის ერთგვარი ლაკმუსის ქაღალდი იმისთვის, რომ შემოწმდეს, ეს რეგულაციები განურჩევლად ყველაზე ვრცელდება, კანონი ნამდვილად უზენაესია მათთვის, თუ მათთვის ამოსავალი წერტილი პირადი პოლიტიკური სიმპათია და ანტიპათიაა,“ – განაცხადა ეკა სეფაშვილმა.
