ნუგზარ წიკლაური – ვინც თვითმმართველობის არჩევნებში მონაწილეობას გადაწყვეტს, მძიმე პასუხს მიიღებს ქართველი ხალხისგან, სხვა იარაღი ჩვენ არ გვაქვს – პარტიებმა მკაფიოდ უნდა გამოთქვან პოზიცია
„კოალიცია ცვლილებისთვის“ ერთ-ერთი ლიდერი, ნუგზარ წიკლაური ოპოზიციურ პარტიებს ადგილობრივი თვითმმართველობის არჩევნებთან დაკავშირებით მკაფიო პოზიციის დაფიქსირებისკენ მოუწოდებს.
როგორც წიკლაურმა „პალიტრანიუსის“ გადაცემაში „360 გრადუსი“ განაცხადა, თავად „კოალიცია ცვლილებისთვის“ უარს ამბობს ადგილობრივ არჩევნებში მონაწილეობაზე.
მისივე მოსაზრებით, ოპოზიციური სპექტრი უნდა აცნობიერებდეს, რომ ასეთი არჩევნები რეალურ ცვლილებებს ვერ მოიტანს.
„პარტიებმა მკაფიოდ უნდა გამოთქვან საკუთარი პოზიცია. ქართულმა პოლიტიკამ შეიძინა ისეთი ფუნქციები, როდესაც ლიდერები სიტყვით ერთს ამბობენ, საქმით სხვას ფიქრობენ და მოქმედებას კი სულ სხვანაირად აპირებენ. მგონია, რომ არანორმალური ვითარებაა. მკაფიოდ უნდა გამოთქვან თავიანთი პოზიცია! ჩვენ ვთქვით, რომ ამ ფარსში, რომელსაც ვითომ ადგილობრივ თვითმმართველობის არჩევნებს უწოდებენ, მონაწილეობას არ მივიღებთ.
სალომე ზურაბიშვილის განცხადების შემდეგ, თავად ამ პლატფორმის წევრებმა უარყვეს, თვით სალომე ზურაბიშვილის ნათქვამი. მიმაჩნია, რომ ასეთი ნაბიჯები არ შეესაბამება ჩვენი ქვეყნის ეროვნულ ინტერესებს, როდესაც ხალხს ეუბნები, რომ ადგილობრივ თვითმმართველობის არჩევნებში შესაძლებელია ამ რეჟიმის დამარცხება და შემდეგ ქვეყნის წინ წაყვანა, ეს ასე არ არის. მეტსაც ვიტყვი – პირად საუბრებში ამ პარტიის წარმომადგენლები თვითონაც ამბობენ, რომ ადგილობრივ თვითმმართველობის არჩევნებში რამეს აიღებენ.
ახლა ძალიან მარტივად არის საქმე ან ხარ ქართველი ხალხის მხარეს ან ივანიშვილის პოლიტიკური რეჟიმის ლეგიტიმაციაში იღებ მონაწილეობას. ძალიან არ მომინდებოდა თუკი პოლიტიკური პარტიების ერთი ნაწილი აღმოჩნდებოდა ივანიშვილისთვის „გამპარვებელი““,- განაცხადა წიკლაურმა.
ამასთან, წიკლაური დასძენს, რომ ქვეყანაში არსებული პოლიტიკური ვითარებიდან გამომდინარე ერთადერთი გამოსავალია ახალი, თავისუფალი და სამართლიანი საპარლამენტო არჩევნების ჩატარება, რომელიც უნდობლობის გარეშე ჩაივლის:
„თუკი ახალი არჩევნები არ ჩატარდება, ეს კრიზისი ვერ გადაილახება. აუცილებლად უნდა დაინიშნოს ახალი საპარლამენტო არჩევნები, რომელსაც ეყოლება ისეთი ადმინისტრაცია, რომ არ დარჩება ეჭვი ამ არჩევნების შედეგებთან დაკავშირებით“,- განაცხადა წიკლაურმა.
ამასთან, წიკლაური აცხადებს, რომ „ვისაც ადგილობრივ არჩევნებში მონაწილეობა აქვს გადაწყვეტილი, ქართველი ხალხისგან მძიმე პასუხს მიიღებს“.
„ადგილობრივ თვითმმართველობის არჩევნები არ არის ტაქტიკური საკითხი. ეს ნაბიჯები შესაძლოა იყოს საქართველოს ეროვნული ინტერესების წინააღმდეგ მიმართული და „ქართული ოცნების“ მაშველ რგოლად იქნეს გამოყენებული, ამას ჩვენ ყველანაირად შევეწინააღმდეგებით – ჩვენი მტკიცე პოზიციით, თუნდაც ამისათვის დაგვიჯდეს ამდენი ლიდერის ციხეში გამოკეტა. ვინც არჩევნებში მონაწილეობას გადაწყვეტს, მძიმე პასუხს მიიღებს ქართველი ხალხისგან. სხვა იარაღი ჩვენ არ გვაქვს“,- აცხადებს ნუგზარ წიკლაური.
