„2004 წლის თებერვალში დაიწყო ჩემზე ზეწოლა, სააკაშვილის ხელისუფლება რომ მოვიდა“-ამის შესახებ გორის ბაზრის ყოფილმა მფლობელმა და „ნაციონალური მოძრაობის“ დროს დაზარალებულმა ბიზნესმენმა ჯემალ წიკლაურმა 2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისიის სხდომაზე განაცხადა, სადაც საკუთრების უფლების დარღვევისა და არაადამიანური მოპყრობის ფაქტების საკითხები განიხილება.
„ჩემი საკუთრება, გორის ბაზარი შევისყიდე 1996 წელს კონკურსის წესით. დამწვარი იყო ეს ბაზარი და მისი აღდგენა მქონდა დავალებული. 2004 წლის თებერვალში დაიწყო ჩემზე ზეწოლა, სააკაშვილის ხელისუფლება რომ მოვიდა. დამიბარა მიშა ქარელმა, მაშინდელმა გუბერნატორმა და მითხრა, რომ „უნდა დათმო ობიექტი, ჩააბარო სახელმწიფოს, თუ არადა პრობლემები გექნება“. მე რა თქმა უნდა, უარი ვუთხარი. გადაწყვიტეს ჩემთან, საწარმოში შემოსვლა და შემოწმება ჩაეტარებინათ, მაგრამ მე მოვთხოვე სასამართლო განჩინება და არ შემოვუშვი. ამის მერე მეძახიან სამსახურში, რომ „ჯემალ ვიღაც არის შემოსული და აწიოკებს ბაზარს“, გამოვედი, შევხედე და მიშა ქარელი, გუბერნატორი, გარშემო ჰყავს პროკურორი, ტელევიზია, ვინც მათ ემორჩილებოდა.
შემოვიდა საგადასახადო სამსახური, შეამოწმეს და დამიდგინეს, რომ ვითომ სახელმწიფოს დავუმალე 300 ათასი ლარი გადასახადი. ამის საფუძველზე დამაკავეს. ორმა სასამართლომ სამ თვიანი პატიმრობა მომისაჯა. სხვათა შორის, პირველი მეწარმე ვიყავი საქართველოში, რომელიც დამიჭირეს. 2004 წლის 23 თებერვალი იყო რომ დამაკავეს. ციხეში ყოფნის დროს დიდი ზეწოლები [იყო]. მოგეხსენებათ როგორი პირობები იყო, მაგრამ მე გამიმართლა ის, რომ ახალაიების დროს არ ვიყავი, თორემ მე ცოცხალი ვერ გამოვიდოდი“-განაცხადა ჯემალ წიკლაურმა.
