ახლა თანხები ჩარიცხულია და იმ პროპაგანდას, იმ ქმედებებს აგრძელებს, რაც მას ამ თანხების გამომუშავებით ეკისრება, – ასე შეაფასა ჟურნალისტებთან საუბრისას რეგიონული პოლიტიკისა და თვითმმართველობის კომიტეტის თავმჯდომარემ, ირაკლი ქადაგიშვილმა ჯო უილსონის განცხადება, რომ ე.წ. მეგობარი აქტი მათ საქართველოს ხელისუფლების წინააღმდეგ სჭირდებათ და რომ „ქართული ოცნება“ ანტიამერიკულია.
ირაკლი ქადაგიშვილის თქმით, ჯო უილსონი ქართული ხელისუფლების რეალურ პოლიტიკას მოწყვეტილია.
„გამჭვირვალობის კანონმა, რომელიც ამერიკაში მოქმედებს, მოგვცა იმის საშუალება გაგვეგო, რომ კვლავ არის თანხა გადახდილი „ნაციონალური მოძრაობის“ მიერ იმ ლობისტურ კომპანიაზე, რომელიც შემდგომ უკვე აფინანსებს ხოლმე ჯო უილსონს. ამიტომ, ის რაღაც რამდენიმე თვიანი წყვეტა რომ იყო, ჯო უილსონი გაჩერებული იყო. ახლა თანხები ჩარიცხულია და იმ პროპაგანდას, იმ ქმედებებს აგრძელებს, რაც მას ამ თანხების გამომუშავებით ეკისრება.
მოწყვეტილია რეალობას ქართველი ხალხის, ქართული ხელისუფლების რეალურ პოლიტიკას და მისდევენ იმ აბსურდულ გეგმას, რასაც ჰქვია „ჩავარდნილი რევოლუცია“, – აღნიშნა ირაკლი ქადაგიშვილმა.
