შარშან, მოგვეცა 12 რეკომენდაცია იმისთვის, რომ მიგვეღო ევროკავშირის წევრის კანდიდატის სტატუსი. გუშინდელი გადაწყვეტილებითა და ანგარიშით, ევროკომისიამ თქვა, რომ 12 რეკომენდაციის შესრულების პროგრესი საკმარისია, რათა საქართველომ კანდიდატის სტატუსი მიიღოს, – ამის შესახებ გადაცემაში „იმედი Live“ პარლამენტის თავმჯდომარემ შალვა პაპუაშვილმა განაცხადა.
„გაიხსნა შემდეგი კარი, რომელსაც ჰქვია გაწევრიანების შესახებ მოლაპარაკების დაწყება და ამასთან დაკავშირებით უკვე 9 რეკომენდაცია მოგვეცა, რომელზეც ჩვენმა ქვეყანამ უნდა იმუშაოს. ამ 9 რეკომენდაციაში არის ნაწილი, რომელიც 12 რეკომენდაციაში იყო და ასევე არის რაღაც დამატებული – ეს არის ახალი ეტაპი. ფაქტობრივად ეს არის ის მდგომარეობა, როცა შარშან უკრაინას როგორც მისცეს კანდიდატის სტატუსი და შემდეგ იყო რეკომენდაციები მოლაპარაკების დაწყებისთვის. ამიტომ ჩვენი შემდეგი ეტაპი იქნება სწორედ ამ საკითხებზე მუშაობა“, – აღნიშნა შალვა პაპუაშვილმა.
8 ნოემბერს, ევროკომისიამ საქართველოსთვის კანდიდატის სტატუსის მინიჭების რეკომენდაცია გასცა. რეკომენდაციები ევროპულ საბჭოს გადაეგზავნება. ლიდერები საბოლოო გადაწყვეტილებას, დეკემბერში მიიღებენ.
