უკრაინის თავდაცვისა და იუსტიციის სამინისტროებმა მხარი დაუჭირეს რეგისტრირებული პარტნიორობის კანონპროექტს. ამის შესახებ ადგილობრივი მედია დეპუტატ ინა სოვსუნზე დაყრდნობით იტყობინება.
მათი ცნობით, კანონპროექტების მიზანია დაეხმაროს LGBT-წევრებს განსაზღვრონ საერთო უფლებები და ვალდებულებები, უძრავი ქონების საკითხი, მემკვიდრეობა, სოციალური დაცვა და პარტნიორის გაუჩინარების შემთხვევაში არსებული უფლებები.
სოვსუნმა კანონი უკრაინის რადას 2023 წლის მარტში წარუდგინა. დოკუმენტზე არასამთავრობო ორგანიზაციები 9 თვის განმავლობაში მუშაობდნენ. მაშინ სამინისტროებმა კანონპროექტს მხარი არ დაუჭირეს, რადგან ერთნაირსქესიანთა პარტნიორობა მასში ქორწინებასთან იყო გაიგივებული. ახლა უწყებების პოზიცია შეცვლილია. იუსტიციის სამინისტრო კანონპროექტის მეორე მოსმენით განხილვისთვის შენიშვნებსაც ამზადებს.
„ახლა ინიციატივა პარლამენტის ხელშია, რომელმაც მხარი უნდა დაუჭიროს კანონპროექტს პირველი მოსმენით, რათა საშუალება მისცეს იუსტიციის სამინისტროს მეორე მოსმენაში თავისი შენიშვნების შეტანისთვის“, – განაცხადა სოვსუნმა.
